關於台語齒盤

台語齒盤是一个予逐家佇手機仔拍台語 ê 拍字家私，拍字 ia̋n-jín 由台灣人家己開發，照台灣人拍字 ê 習慣設計。支援 iOS 佮 Android，會當用白話字、教育部台羅佮方音符號拍字。

台語齒盤永遠免費、無廣告，嘛袂推出付費功能。毋管是一般使用者、學校、先生抑是台語教育團體，攏會當自由使用。希望予逐家用台語、教台語 ê 時，毋免閣增加額外 ê 負擔。

這个計畫目前由我一个人利用上班以外 ê 時間開發佮維護。所需要 ê 費用主要由我家己負擔，嘛有逐家 ê 贊助支持。向望台語齒盤會當一直維持落去，予逐个想欲用母語拍字 ê 人，攏有一个好用 ê 家私。

功能特色

白話字、教育部台羅、方音符號佮英語，佇齒盤頂懸直接切換。

毋免離開齒盤，直接揀表情、切換分類，揣著你想欲 ê 表情。

齒盤會照你 ê 拍字習慣排列佮建議詞，齒盤愈用愈巧。

自由揀色水、字型佮齒盤主題，設定合你慣勢 ê 拍字畫面。

教育部用字、非教育部用字、在來字佮異用字，照家己 ê 習慣來揀。

台語齒盤無連網路、無錄音，拍 ê 內容嘛袂送出去，資料攏佇手機仔內底。

若拍漢字，會自動使用全形標點符號，拍羅馬字會自動切去半形標點符號，建議 ê 候選詞會顯示佇頂頭，嘛會使褫開看較清楚。

【設定】>【一般/系統】>【齒盤】

點【齒盤】>【加入台語齒盤】>【允准完整取用】

※ 無仝牌子 ê 手機仔設定可能無仝，但是啟用方法攏差不多。

※ 「允准完整取用」是予齒盤會當捌你揤 ê 動作，成做你拍 ê 字，請放心，台語齒盤袂偷錄任何資料。

無論是使用上拄著 ê 問題、感覺好用 ê 所在，抑是會當改進 ê 建議，攏歡迎寄批 info@taigikeyboard.tw 予我！